'n HOË amptenaar van Absa het die naweek bo die Tempe-lughawe by Bloemfontein sy deeglike vliegkennis ingespan en 50 minute lank in die lug bly sirkel en spook om veilig te kan land, nadat sy ligte vliegtuig se onderstel en wiele nie wou uitkom nie.
Reddingspanne was deurgaans gereed op die grond vir ingeval die ergste sou gebeur.
Mnr. Deon Loots (54) van Bloemfontein, voorheen streekhoof van Absa in die Vrystaat en deesdae ’n hoë amptenaar in dié bank se hoofkantoor in Johannesburg, en sy seun Deon jr., het ’n plesiervlug in Loots sr. se Piper Arrow onderneem.
Toe hulle wou land, was daar probleme. Die hidrouliese onderstel wou nie reageer nie en die wiele wou nie uitkom nie.
Loots sr., ’n bestuurslid van die Suid-Afrikaanse Kragvliegvereniging, het die onderstel met die hand laat afsak, maar toe het een van die waarskuwingsliggies getoon een van die afgesakte wiele wou nie sluit nie.
Met sy 1000 vliegure agter die blad het Loots sr. die vliegtuig aanhoudend skerp laat draai en dit ook herhaaldelik laat daal en weer opgeruk om dié wiel ook gesluit te kry.
Só is ’n noodlanding uitgeskakel.
Hy sê wat in hul guns getel het, was dat die vliegtuig nog baie brandstof gehad het. Anders sou hy sonder die onderstel en wiele ’n buiklanding moes doen.
“My seun is 30 jaar oud, maar seker nou 90,” het Loots sr. gister geskerts.
Hy sê hy en sy seun het mekaar deurentyd kalm gehou.
Hy sê die plaaslike Westlife Aviation het die moontlike noodgeval so goed hanteer soos wat enige van die land se internasionale lughawens dit sou hanteer.
Personeel van Westline Aviation, die Mangaung-brandweer, die noodreddingsdiens van Life Rosepark en Netcare911 het op die lughawe gereed gestaan vir daardie noodlanding wat toe nie nodig was nie.
Loots sr. sê hiervoor en vir elke vlieënier wat hulle oor die radio moed ingepraat het, is hy innig dankbaar.
- Volksblad
No comments:
Post a Comment