Mikayla Robbertse van Lephalale (Ellisras) is ongeduldig om te sien wat onder daardie verbande aangaan, nadat sy vandeesweek weer rekonstruktiewe chirurgie gekry het in die Steve Biko Akademiese hospitaal.
Foto: Charmain Robbertse
Mikayla Robbertse (5) van Lephalale (Ellisras) is bra vies vir die wêreld.
Dié kind, wat in Desember deur ’n Mosambiekse spoegkobra gepik is, het gedink haar hand sou dadelik “mooi” lyk ná nog rekonstruktiewe chirurgie wat sy vandeesweek in Pretoria gekry het.
Toe sy wakker word in die Steve Biko- akademiese hospitaal, moes sy egter vaskyk in ’n klomp gips en verbande, het haar ouma Charmain gister gesê.
“Ek het vir haar gesê die verbande kan later dié maand, wanneer dit haar verjaardag is, af, maar sy wil niks weet nie.”
Mikayla het byna al die weefsel bo-op haar hand en voorarm verloor omdat die kobra se gif nekrose veroorsaak het.
Dokters het ’n liesflapprosedure in Januarie gedoen waar vel van haar lies op die hand vasgewerk is. Dit het genees, maar sy het die funksie in haar middelvinger deels verloor.
Eergisteroggend is vet uit die weefsel wat bo-op haar hand uitgebol het, gesuig om dit platter te maak. ’n Spier is ook uit haar pols gesny en oorgeplant in haar middelvinger.
Dié vinger is aan haar ringvinger vasgewerk as deel van ’n proses om die middelvinger se funksie te herstel.
Mikayla is vir minstens nog ’n week in die hospitaal.
- BEELD
No comments:
Post a Comment