’n Brand het gistermiddag verskeie plakkershutte in die Lusaka informele nedersetting in Kruispad naby Nyanga verwoes. Die brand het net ná 15:30 uitgebreek en baie vinnig versprei.
Volgens mnr. Wilfred Solomons-Johannes, woordvoerder van die munisipale rampbestuureenheid, het 45 hutte afgebrand en is omtrent 160 mense dakloos gelaat.
“Daar is geen beserings of sterftes aangemeld nie. Oorhoofse elektriese kabels is ook in die brand beskadig wat kragtoevoer na die gebied beïnvloed het. Munisipale beamptes het gisteraand die toevoer herstel.”
Die rook het ook vir ’n hele tyd lank motoriste se sig op die N2 na en van die stad belemmer. Dit het ’n bietjie van ’n opeenhoping veroorsaak.
Die rampbestuureenheid het kospakkies, komberse, klere en boumateriaal aan die mense wat deur die brand geraak is, uitgedeel.
- Die Burger
No comments:
Post a Comment