Welkome reën bring modder frustrasie

GEORGE NUUS - 'n Verandering in George se weerstoestande die afgelope twee weke, het drastiese veranderings in George se waterkwaliteit tot gevolg gehad.

Verskeie klagtes is ontvang oor modder in die water. George-munisipaliteit se direkteur siviele ingenieurswese, Harold Basson, het gesê hulle is bewus van die probleem. "Die probleem is veroorsaak deur 'n drastiese verandering in die waterkwaliteit uit die Tuinroetedam. Die swart gekleurde water in die dam veroorsaak laagvorming in die dam, en die onderste lae is van 'n baie swakker kwaliteit," het Basson verduidelik.

Hy het gesê dit is 'n natuurlike proses en gewoonlik is dit nie 'n probleem nie, omdat die onttrekking na die pompstasie van die hoogste punt in die onttrekkingstoring plaasvind. Volgens Basson is daar die afgelope tyd veranderinge in die lae van die dam veroorsaak, waarskynlik as gevolg van die weerstoestande wat veroorsaak het dat van die onderste lae na bo beweeg het.

- George Herald