Johannesburg – Die swaar reën wat die afgelope 48 uur in die Laeveld uitgesak het, het erge skade aan die teeroppervlak van N4-tolpad in die Laeveld veroorsaak.
Skade kom van Nelspruit af tot by Komatipoort voor.
Op verskeie plekke het die boonste 20 mm van die teerlaag as gevolg van die reën begin opskilfer.
Die ergste skade kom tans voor in veral Krokodilpoort net voor Kaapmuiden asook by die omgewing van die Total-vulstasie tussen die Nkomazi-tolhek en Malalane.
Volgens Anita Heyl, woordvoerder van Trac (Trans African Concessions) sukkel hul werkers om die teer wat los kom, van die pad te verwyder.
“Bo en behalwe dat dit hard reën, spoel nuwe stukke teer los sodra die ander rommel verwyder is.”
Naby Komatipoort is ’n nuwe pad wat van die N4 na Tenbosch gebou word, ook besig om probleme te veroorsaak.
“Die grond van die padwerk spoel in hierdie stadium oor die N4,” sê Heyl.
Sy sê die reën en mis veroorsaak dat sig in die Laeveld baie swak is.
Sy waarsku motoriste ook om versigtig te bestuur omdat water op verskeie plekke oor die pad stroom.
Herstelwerk aan die N4 kan eers begin wanneer die reën opgeklaar en die teerpad droog is.
- Beeld
No comments:
Post a Comment