GEORGE NUUS - 'n Tienerseun het verlede Donderdag op Victoriabaai vir sy lewe geveg nadat hy byna verdrink het.
Die seun (17) van Thembalethu en vriende het omstreeks 14:30 gaan swem toe hy deur sterk seestrome ingetrek is.
Clifford Marlow, van die Wildernis Nasionale Seereddingsinstituut (NSRI) sê met hul aankoms op die strand was ER24-paramedici reeds besig om die seun te behandel.
Twee omstanders, Michele Casati en Ignus Bezuidenhout, het die seun uit die see gehaal en na die strand gebring.
Bezuidenhout, 'n voormalige NSRI-vrywilliger, het sy ervaring gebruik om die seun te red, wat ook met uitputting, verkluiming en naby verdrink-simptome gesukkel het. Die seun is daarna in 'n stabiele toestand na die hospitaal geneem.
Volgens Vanessa Jackson, woordvoerder van ER24, was die seun by sy volle bewussyn, maar baie koud en gespanne. Hy het ook geweldig baie seewater gesluk.
Die groep tieners het vermoedelik vanuit Thembalethu na die strand geloop om te gaan swem.
ARTIKEL: ALVIZO MIGGELS - George Herald
No comments:
Post a Comment