Die lyk van die vierde onwettige myner word uit die Bontekoe-myn in die Noord-Kaap gehaal. Foto: Jaco Marais
KAAPSTAD. – Tien lyke is tot dusver uit die verlate myn, wat Dinsdagoggend op nagenoeg 30 onwettige diamantmynwerkers ingesak het, gehaal.
Die eerste tonnel wat reddingswerkers Donderdag by die Bontekoe-myn buite Kleinzee in die Noord-Kaap bereik het, is skoongemaak, het mnr. Tom Tweedy, woordvoerder vir die De Beers-mynmaatskappy, gister gesê.
Die polisie het vroeër gesê 11 van die mynwerkers kon betyds van die myn wegkom.
Nog ’n mynwerker is Dinsdagmiddag deur ander mynwerkers gered. Vier van die tien lyke is Saterdag deur reddingswerkers uitgehaal.
Verlede week is berig die eerste lyk is Woensdag omstreeks 02:18 deur reddingswerkers uitgehaal. Die aand omstreeks 19:28 is die tweede lyk uitgehaal.
Vrydag is nog vier lyke by die gedeelte van die myn wat as “Facebook” bekend staan, uitgehaal.
Tweedy het gesê die gebied waar die rotsstorting plaasgevind het, is steeds te onstabiel. Sou reddingswerkers deur daardie bestaande tonnels grawe, is die kanse groot dat die grond ook op hulle sou inval.
Reddingswerkers grawe nou die tonnels wat hulle gegrawe het verder uit. Vanaf “Facebook” werk die reddingswerkers in die rigting van die die tweede tonnel en die wagkamer.
Hy het gesê die herwinningsoperasie sal nie afgelas word voordat elke lyk uit die mynskag gehaal is nie.
Intussen het kapt. Cherelle Ehlers, ’n woordvoerder vir die polisie in die Noord-Kaap, bevestig dat nog geen verdere lyke uit die myn gehaal is nie. Sy het ook gesê nog geen van die lyke wat uitgehaal is, is positief geïdentifiseer nie.
- Volksblad
No comments:
Post a Comment