Pa verbrand, dogter kyk hulpeloos toe

JOHANNESBURG – ’n Tienermeisie van Tzaneen moes hulpeloos toekyk hoe haar pa in ’n veldbrand doodbrand.

Anicka Brandt (16) het haar pa, Thinus, Saterdagoggend gehelp om ’n veldbrand op hul plaas te probeer blus.

Mev. Ansie Brandt sê die vlamme was aanvanklik nie erg nie, maar is deur die wind vererger en het toe haar man oorval.

“My dogter het my gesê die vuur het soos ’n golf oor hom gegaan. Ek wens sy het dit nie gesien nie.”

Brande het verlede week duisende hektaar plantasies in die Tzaneen-gebied in Limpopo verwoes.

Ansie sê haar man was ’n wonderlike eggenoot en pa en hulle gaan hom baie mis. Hy het ook altyd ander gehelp.

“Dit voel nog onwerklik.”

Etienne Meyer, ’n kollega van Thinus by die departement van waterwese in Tzaneen, het gesê: “Hy was ’n goeie mens. Hy het my gehelp om ’n werk te kry.”

- Volksblad